झापा । राप्रपाका अध्यक्ष राजेन्द्र लिङ्देनले प्रधानमन्त्री समेत रहेका एमाले अध्यक्ष केपी ओलीसँग झापा ५ बाटै चुनाव लड्न तयार रहेको जवाफ दिएका छन् । झापाको ११ औँ जिल्ला अधिवेशनलाई सम्बोधन गर्दै समय र जनताले मागे आफू ओलीसँग चुनाव भिड्न तयार रहेको बताए।

प्रधानमन्त्री ओलीले काठमाडौं जिल्ला कमिटीका नेताहरूसँग कुरा गर्दै अध्यक्ष लिङदेनलाई अब झापाबाट कसरी चुनाव जित्दो रहेछ हेरौँला भन्ने टिप्पणी गरेका थिए।

त्यसको जवाफ फर्काउँदै उनले भने, ‘हामीले सुशासनको कुरालाई लिएर हाम्रो आवाजहरू बुलन्द गर्न थाल्यौँ। जब अस्ति प्रधानमन्त्रीले आफ्ना कार्यकर्ताहरूलाई ब्रिफिङ गर्ने बेलामा त्यो राजेन्द्र लिङ्देन भन्ने मान्छे झापामा कहाँबाट चुनाव जित्दो रहेछ हेरौँला भन्नुभएछ। म उहाँलाई यहीबाट शालीनतापूर्वक यहीबाट जवाफ दिन्छु हाम्रो केही सङ्गत भयो राजनीतिमा, दलहरूबीच राजनीतिमा छलफल सहकार्य हुन्छन्। विमतिका बीचमा पनि मिलेर गर्नुपर्ने थुप्रै कामहरू हुन्छन्। भविष्यमा पनि त्यस्ता भेटवार्ता हुन्छ होला।’

उनले आफूले वडा सदस्य समेत नभए पनि यो भ्रष्ट व्यवस्थाविरुद्ध उभिन्छु भनेर राजनीति सुरु गरेको बताए। उनले प्रधानमन्त्री ओलीलाई ०८४ मा संविधान संशोधन गरेर प्रत्यक्ष निर्वाचित प्रधानमन्त्रीको व्यवस्थामा जान समेत चुनौती दिए।

उनले थपे, ‘सांसद त के बाँकी जीवन वडा सदस्य समेत नभई मर्न तयार छु। तर यो भ्रष्ट व्यवस्थाविरुद्ध उभिन्छु भनेर राजनीति सुरु गरेको हुँ। समयले खोजेछ भने जनताले चाहेको खण्डमा झापा ५ टाढा होइन। म त्यहीँबाट लड्न सक्छ। समयको कुरा हो। जनताले चाह्यो, जनताले माग्यो भने ५ मा गएर चुनाव लड्ने हिम्मत राख्ने मान्छे हुँ।’